Жаңазенде жұмыссыз қалған мұнайшылардың талабынан кейін қаладағы «Өзенмұнайгаз» бен бірқатар сервистік компанияларда заң бұзушылықтар анықталып жатыр. Шулы оқиғадан кейін «ҚазМұнайГаз» ҰК» АҚ арнайы комиссия құрып, мұнайшылар қаласындағы жағдайды тексерді.
«Өзенмұнайгаз» бен мердігер мекемелердегі жұмыстарды тексеру кезінде шектен шыққан жағдайларды анықтап, құқықтық баға беруді көздеп отыр. Жұмыс тобының мүшелері енді қаржы-шаруашылық қызметі бағытында есеп құжаттамаларын тексереді.
Жұмыс тобының жетекшісі Д.Хасановтың айтуынша, «Өзенмұнайгаз» компаниясында жұмыс орындарына келмеген қызметкерлерді жұмысқа орналастырған деректер анықталған. Тіпті, олардың арасында ақтаулық белгілі айтыскер ақын жұмыс кезегінде тұрған тоғыз мың адамға қарамастан, алдымен штатта теолог, кейіннен қоғаммен байланыс жөніндегі маман қызметін атқарып келген.
«Компания штатына кезектен тыс немесе біліктілік талаптарына сәйкес келмейтін және жөндеумен айналысатын бөлімшелердің мамандықтары бойынша жеткілікті жұмыс тәжірибесі жоқ адамдарды жұмысқа қабылдау деректері бар», - деді Дәулетжан Хасанов.
Сонымен бірге, өндірістегі бірқатар жүк көліктерінің GPS деректерін уақытпен салыстырғанда сәйкес келмейтін көптеген жайттар анықталған.
«Көліктер нақты жүріп өткен уақыт аралығын табельдерде асыра көрсеткен. Тиісінше, атқарылған жұмыс үшін төлем де асыра бағаланғаны белгілі болды», -деді Д.Хасанов.
Бұдан бөлек, өндіріске қажетті жабдықты жалға алу ақысын екі есе артық етіп көрсетіп, «ақша тапқандардың» да ұрлығы ашылды. Тексеру кезінде жұмыс тобы мұнай өндіретін жабдықты жалға алу қызметі бірнеше есе жоғары бағаға көрсетілген жағдайды анықтап отыр. «Өзенмұнайгазға» сервистік қызмет көрсететін әмбебап электр орталықтан тепкіш сорғыны тәулігіне ұңғымаға 96 мың теңге бағамен жалға берген. Ал басқа мұнай өндіруші компанияның дәл осындай сорғыны жалға беру бағасы бұдан 2 есе арзан екені белгілі болды.
Мұнай саласындағы тексеру кезінде ӨМГ ұңғымаларды жөндеуге арналған 14 дана көтергіш агрегат сатып алғанымен, әлі күнге олардың тек біреуі ғана жеткізілгенін комиссия анықтап білген. Жалпы сомасы 1,5 млрд теңгеден асатын агрегаттар өткен жылдың соңына дейін толық әкелінуі тиіс болған. Ал қазір пайдалануға берілген біреуінің көптеген бөлшектерінің жоқ екені, пайдалану үшін қауіпті екені, әрі жасыру үшін тот басқан корпусы мен шассидің металл конструкциялары қара түске боялғанын ҚМГ төрағасының орынбасары жариялады.
Сонымен қоса, ӨМГ-нің кейбір мердігер ұйымдарында зейнетақы аударымдарын 2-3 айға кешіктірген жағдайларына шағым білдірген. Әрі көлік қызметін ұсынатын мердігер ұйымдардың қызметкерлері арнайы киіммен және тамақпен қамтамасыз етілмейтіні де шудың туындайтынына белгілі бір деңгейде әсер ететіні айтылды.
«Алда жұмыс жалғасады. Бұл анықталған жергілікті бұзушылықтардың кейбір мысалы ғана. Жаңа деректер туралы біз жұртшылықты хабардар етіп отырамыз. Анықталған бұзушылықтардың әрбір тармағы бойынша құқықтық баға берілетін болады. Барлық жауаптылар құқық бұзушылықтардың ауырлығына байланысты жазаланады. Тиісті құжаттарды құқық қорғау органдарына тапсырамыз», -деді Д.Хасанов.
Ескерте кетейік, осы айдың басында Жаңаөзенде сервистік қызмет көрсететін компания қызметкерлері жұмыстан қысқарып, кейін талап қойған еді. Олар еңбек ететін компания конкурста жеңілгеніне байланысты жұмысшыларды қысқартуға мәжбүр болған. Осыдан кейін «Өзенмұнайгаз» АҚ алдында түнеп, жұмыс беруді сұраған жұмысшылар мәселе шешімін таппаған соң Астанаға барды. Энергетика министрлігі алдында өз талаптарын қойғанымен мәселе шешілген жоқ. Бірнеше рет кездесу өткеніне қарамастан олар ортақ мәмілеге келе алмады. Кейін ҚМГ жанынан құрылған комиссия Жаңаөзенге бір айға келіп, қаладағы компаниялардағы ахуалды, ішкі жағдайды тексеретінін айтқан.
Байланысты жаналықтар
MalimBlocks
Ақын Жұмекен Нәжімеденовтың өлеңдері
Жұмекен Сабырұлы Нәжімеденов 1935 жылы 28 қарашада Атырау облысы, Құрманғазы ауданы Қошалақ ауылында туған. 1983 жылы 22 қарашада дүниеден озған. Қазақстан Республикасы Мемлекеттік әнұранының авторы, көрнекті ақын, журналист, Қазақстан Жастар одағы сыйлығының иегері.
Ақын Жұматай Жақыпбаевтың өлеңдері
Жұматай Жақыпбаев (1945-1990) - Алматы облысы, Талдықорған ауданындағы Ешкіөлмес ауылында туған. Журналист. Ақын. Еңбек жолын кітапхана меңгерушісі болып бастаған. Қазақ мемлекеттік университетін бітірген. Талдықорған облыстық «Октябрь туы» газетінде, облыстық радиода және «Жалын» альманахында поэзия бөлімінің редакторы, Қазақстан Жазушылар одағында әдеби кеңесші болды. Алматы қаласы көшелерінің біріне есімі берілген.
Ақын Кеңшілік Мырзабековтың өлеңдері
Кеңшілік Ағытайұлы Мырзабеков 1946 жылы 6 маусымда Қостанай облысы, Жангелді ауданында дүниеге келген. 1989 жылы 30 қаңтарда Алматыда қайтыс болған. Журналист. Ақын. ҚазМУ-дың журналистика факултетін бітірген. Қостанай облысы “Коммунизм таңы” (қазіргі “Қостанай таңы”), “Лениншіл Жас” (қазіргі “Жас Алаш”), Алматы облысы “Жетісу”, “Социалистік Қазақстан” (қазіргі “Егемен Қазақстан”) газеттерінде, “Жазушы” баспасында, “Мәдениет және тұрмыс” (қазіргі “Парасат”) журналында қызмет атқарды. Ақынның алғашқы жинағы “Іңкәр дүние” 1972 жылы баспадан шықты.
