«Бес батырдың» бірін атып кетті
Алматы облысы Ақсу ауданы Қызылағаш ауылының тумасы, бес батыр атанған азаматтың бірі Мұхаметалин Бейбіт Талапұлы қайтыс болды. Ол кезінде қытай азаматтарын соққыға жыққаны үшін шартты түрде сотталған.
Бейбіттің ауылдастарының айтуынша Бейбітті көршісі атып тастаған. Алдын ала мәлімет бойынша марқұм аңшы мылтығының оғынан (бытыра) қаза болған. Оны атқан көршісі 1978 жылы туған Әділет Ақжалбеков қазір күзет астында отыр.
Алматы облысы полиция департаментінің мәліметінше оқиға кеше кеш бата болған.
«22 мамыр күні сағат 18:50 шамасында Ақсу ауданы Қызылағаш ауылындағы жеке үйлердің бірінің ауласынан оқ тиген 35 жасар ер адамның денесі табылды. Полицияның жедел іздестіру шараларының нәтижесінде ауылдасын өлтірді деген күдікпен 43 жастағы жергілікті тұрғын ұсталды. Алдын ала белгілі болғандай, күдікті жәбірленушіні 16 калибрлі аңшы мылтығымен атқан. Факт бойынша 99 бап (кісі өлтіру) негізінде тергеу басталды. Күдікті қамауға алынды. Қару тіркіленіп, қылмыстық іс материалына тіркелді», - делінген полиция департаменті баспасөз қызметінің хабарламасында.
Аталған екі азамат та азаматтық белсенді.
Оқи отырыңыз: «Ауылда екі сиыр бағатын жер жоқ»
2019 жылдың 7 қазан айында Алматы-Өскемен автожолының 303 шақырымында 1998 жылғы Қанат ЖАМБЫЛ есімді азаматты Лянг ЖЕНГ, Ченг ПЕНГЛИНЬ, Чанг ХУЙ есімді қытай азаматтары ұрған. Олар әкімшілік жауапкершілікке тартылып,10 тәулікке қамалған. Сол күннің ертеңінде Алматы облысына қарасты Ақсу ауданының бес тұрғыны қытай азаматтарымен төбелеседі. Бұл бес қызылағаштық осыдан кейін істі болып, ұзақ уақыт бойы тергелген. Бұл оқиға қоғамдық резонанс тудырып, қытайлық «Citic Construction» компаниясының жұмысшыларын ұрған бес жігітті «бес батыр» атап кеткен. Марқұм Бейбіт Мұхаметалин осы бесеудің бірі.
Ал, күдікті Әділет Ақжалбеков осы ауылдағы жер дауы кезінде көзге түсіп, жайылым мен егістік алқаптың жоқтығын айтып, жиі мәселе көтеріп жүрген.
Самое читаемое
