Үйленіп, отбасын құрамын деген ер адамдар тойдан кейін ақшасы мен алтын бұйымдарынан айырылған. Полицияның мәліметінше, қалыңдық болып барған әйел бірнеше күннен соң құнды заттарды алып, ізін суытып отырған. Ал оны күйеуге беріп жүрген "туысы" шын мәнінде сыбайласы болған деген күдік бар, деп хабарлайды Malim.kz.
Бұл туралы The Times of India басылымы хабарлады. 2026 жылғы сәуірде Мумбаи маңындағы Мира-Роудта полиция 22 жастағы Неха Кханделвал мен 45 жастағы Кесримал Ранканы ұстаған. Тергеушілер олардың бірнеше ер адамды осындай тәсілмен алдаған болуы мүмкін екенін мәлімдеген.
Қалыңдықтың суретін көрсетіп, тойға ақша жинатқан
Істегі жәбірленушілердің бірі — жылжымайтын мүлік саласында жұмыс істейтін 53 жастағы ер адам. PTI агенттігінің полицияға сілтеме жасаған ақпараты бойынша, күдіктілер оған әйелдің суретін көрсетіп, үйленуге ұсыныс жасаған.
Ұсынысты шынайы деп қабылдаған ер адам тойды ұйымдастыру үшін бірнеше банк шотына жалпы 45 750 рупий аударған. Кейін неке рәсімі өтіп, әйел оның үйіне барған.
Алайда отбасылық өмір басталды деп ойлаған ер адам көп ұзамай құнды заттарынан айырылған. Тергеу нұсқасы бойынша, әйел оның сеніміне кіріп, үйінен алтын әшекейлер, ноутбук және өзге де бағалы бұйымдарды алып кеткен. Олардың жалпы құны 456 мың рупий деп көрсетілген. Бұл оқиғаға қатысты әрекеттер 2025 жылдың шілде-желтоқсан айлары аралығын қамтиды.
"Әкесі" кейде "ағасына" айналған
Полицияның айтуынша, Кесримал Ранка болашақ күйеу жігіттерге өзін әйелдің әкесі немесе ағасы ретінде таныстырған. Ол таныстық орнатып, қалыңдықтың суретін жіберіп отырған.
Ал әйел тойдан кейін екі-үш күн өткенде алтын, ақша және басқа да құнды заттарды алып кетіп отырған деген күдік бар. Құқық қорғаушылар олардың негізінен қырық жастан асқан, бұрын ажырасқан ер адамдарды таңдағанын хабарлаған.
Тергеушілердің мәліметінше, күдіктілер бірнеше жыл бұрын Вирар қаласында танысқан. Оларды Махараштра штатындағы бес іс бойынша іздеген.
Басқа қалалардағы оқиғалар да тексеріліп жатыр
PTI таратқан хабарда полицияның Ахильянагар, Джогешвари, Боривали және Джалгаондағы ұқсас оқиғаларды да анықтағаны жазылған. Тергеу күдіктілердің басқа жәбірленушілерге қатысын тексеруге бағытталған.
Екі адамға қатысты алаяқтық және ұрлық баптары бойынша іс қозғалған. Сәуірде жарияланған мәліметте тергеудің жалғасып жатқаны айтылған, сот үкімі туралы ақпарат берілмеген.
