"Бір қызметкер үш адамның жұмысын істейді". Назарбаев әуежайының мамандары шу көтерді.
Жұмысшылар жүкті әлі күнге қолмен тасиды
Елордадағы Назарбаев әуежайы қызметкерлері жұмыс жағдайына байланысты наразылық білдірді. Шағымданушылар жалақыға көңілдері толмайтынын айтып, техника жетіспеушілігін сынға алды.
Әуежай қызметкерлері бір адам үш адамның жұмысын атқарады. Ал табыс көлемі төмен болғандықтан ол азық-түлік, дәрі-дәрмек алуға жетпейтінін айтып отыр. Әуежай басшылығы бұл мәселеге пандемияны себеп қылған.
Жүк тиеуші қызметкер Марат Разхымбековтің сөзінше, бір ауысымда адам жетіспейтіндіктен, 10-12 адам жұмыс істейді.
«Мұндағы жігіттердің барлығында 2-3 грыжа бар. Маған МРТ нәтижелері омыртқаның грыжасын көрсетті. 150-200 мың теңге жалақымызбен мұны емдеу мүмкін емес. Қазір дәрі-дәрмектің өзі 30 мың тұрады. Бұл ақшаға қалай емделіп, отбасымды асыраймын?» – дейді ол.
Жұмысшылар техника жетіспеушілігінен жүкті әлі күнге қолмен тасуға мәжбүр. Амангелді Тукенов соның салдарынан жүктердің ауысып, жоғалып жататынын жеткізді. Жүк ақысы қызметкерлердің жалақысынан ұсталатын көрінеді.
«Әзірге әуежай пандемияға дейінгі көлемінің 80% ғана қалпына келтірілді. Пандемиядан кейінгі кезеңнен бері әуежай биыл алғаш рет жалақы көлемінде үш сыйақы төледі. Әуежай – барлық әлеуметтік төлемдерді жүзеге асыратын тұрақты кәсіпорын», – деді Нұрсұлтан Назарбаев атындағы әуежай басқармасының бірінші орынбасары Дәулет Хамзин.
Басқарма төрағасының өндіріс жөніндегі орынбасары да өткен жылмен салыстырғанда қызметкерлердің жалақысы 27 пайызға өскенін айтты. Соған қарамастан басшылық штатты кеңейтіп, жалақыны қайта қарауға дайынбыз деп мәлімдеді.
