БҚО шенеунігінің төрт жылға бас бостандығы шектелді

Мәди Отарбаев қылмыстық кодекстің 361-бабы (лауазымдық өкілеттіктерді теріс пайдалану) бойынша кінәлі деп танылып, төрт жылға бас бостандығы шектелді. Сонымен қатар сот Отарбаевқа мемлекеттік қызметте жұмыс істеуге өмір бойына тыйым салды.  

Сот қаулысында Отарбаев қылмысқа 2016 жылы барғаны айтылады.

– Отарбаев «UK STROY GROUP» ЖШС үшін пайда табу мақсатында қызметтің мүдделеріне қайшы, лауазымдық өкілеттіктерін теріс пайдаланып, «UK STROY GROUP» ЖШС-нің жұмыстарының түрлері мен көлемін нақты орындамағаны, құрылыс материалдарын сатып алмағанын біле отырып, 2016 жылғы желтоқсанда орындалған жұмыстарды қабылдаудың №1 актісіне қол қойды. 2016 жылғы желтоқсандағы орындалған жұмыстың құны мен шығындары туралы анықтама, сондай-ақ құрылыс материалдарының атаулары, саны мен бағалары көрсетілген №1 жауапты сақтау шарты, «Өскеменде арнайы ХҚКО құрылысы» объектісіне арналған қағазға қол қойған, ал олар іс жүзінде жоқ»,- делінген үкімде.

Отарбаев қол қойып, орындалған жұмыстарды қабылдаудың №1 актісі негізінде «UK STROY GROUP» ЖШС шотына 149 миллион теңге көлемінде қаражат аударылған. Оның 77,8 миллион теңгесі – бюджет қаражаты.

Мәди Отарбаев сот залында қамаудан босатылған. Енді ол пробациялық бақылауда болады.

Айта кетейік, 11 қыркүйекте Мәди Отарбаев «Қордай» шекара бекеті арқылы елден қашып кетпек болған кезінде ұсталған еді.