Даниал Ахметов дұрыс түсіндірмеген бе? Шығыс көмірге таласып жатыр

Өйткені қыс басталмай жатып қалада тағы көмір тапшы. Қатты отын сатылатын жерлерде ұзын-сонар кезек. Бірнеше күннен бері кезек күтіп, кейбір жандар көлік ішінде түнеуге мәжбүр. Жүздеген шақырымды артқа тастап, әдейі келген. Алайда әлі де бірнеше күн күтуге тура келетін сыңайлы. Бұл жағдайдан  облыс әкімі де, қала әкімі де хабардар. Алайда бұл мәселе  шешілмей келе жатқаны тұрғындарды толғандырады.

«Күні бойы бір орында тапжылмай тұрмын. Көліктер тізіліп, кезек баяу жылжуда. Оның үстіне әр адамға 3 тоннадан ғана көмір беруде. Алты ай қыс болатын өңірге қалай жетпек»,-дейді Асқар есімді азамат.

Қала тұрғындары  көмір алу үшін таңғы сағат  5-тен келеді. Кезектегілер таласып-тармасып алып жатыр. Кейбіреуі бір алғаннан кейін, екінші рет қайта кезекке тұрып жатқандарда бар. Ал теміржол тұйығының басшысы көмірдің жоқтығына «Қаражары» кен орнын кінәлап отыр.

«Қатты отын жеткілікті келмегендіктен, кезек күткен адам көбейіп кеткен. Тасымалдайтын вагондарда өте аз. Көмір аз қалды. Қашан келетіні белгісіз»,- дейді терминал директоры Нұржан Қазиев.

Көмір жетпей қала ма деп алаңдап, кезекке таласқан жұрт 2018 жылғы қанды оқиға қайталанама деп қорқады. Естеріңізде болса, Қаражыра көмір кенішінде көмір кезегінде жанжал шығып, оның соңғы адам өліміне әкеліп соққан еді. Сол оқиғадан кейін, былтыр 2020 жылы шілде айында Шығыс Қазақстан облысының әкімі Даниал Ахметов "күзде дүрлікпеу үшін көмірді ертерек сатып алуды тұрғындарға түсіндіру керек" деген еді. Бүгінгі жағдайға қарағанда биыл Даниал Ахметовтің қол астындағылары түсіндіру жұмыстарын дұрыс жүргізбегендей.

Сәке Әкімбай