Павлодарда зорланған жасөспірім 10-қабаттан секіріп кетті
Денсаулығына қатты зақым келген қызға 4 рет операция жасалды
Павлодарда зорланған жасөспірім қыз 10-қабаттан секіріп кетті. Жәбірленуші бала тірі қалды, бірақ денсаулығына айтарлықтай зақым келген. Келеңсіз оқиғаның мән-жайын #НеМолчиKZ қоғамдық қорының басшысы Дина Таңсәрі әлеуметтік желідегі парақшасында жазды.
«16 жасар қыз бала 10-қабаттағы терезеден секіріп кетті. Ағаштар аман қалуына себеп болған, бірақ оған қатты зақым келді.
Бейтаныс біреулер қыз баланы пәтерге алдап кіргізіп, зорлық көрсеткен. Қорлыққа төзе алмаған ол терезеден секіріп кетті. Ең қиыны, ол қыз жетім. Павлодардағы жасөспірімдер үйінің тәрбиеленушісі. Бізге оның жалғыз жақыны – жуырда ғана кәмелетке толған әпкесі хабарласты. Қазір оның құжаттарын тездетіп жәбірленушінің қамқоршысы ретінде рәсімдеу керек», - деп жазды ол.
Анықталғандай, Туған күнге барған қыз отырысты ұнатпай шығып кеткен. Әпкесінің үйіне бетке алған ар қаланы дұрыс білмегендіктен, адасып кетеді. Жолда кездестірген үш жігітті такси шақырып беретінін айтып, өздерімен бірге жүруін өтінген.
Денсаулығына қатты зақым келген қызға 4 рет операция жасалыпты. Қазір есте сақтау және көру қабілеті нашарлап барады.
Ішкі істер министрлігі таратқан ақпаратқа сәйкес, бұл іс Павлодар облыстық полиция департаменті басшылығының бақылауында.
Күдіктілер ұсталып, қамауға алынған. Бірқатар қажетті сараптамалар тағайындалды. ҚР ҚК 120-бабының 3-1-бөлігі, 121-бабының 3-1-бөлігі және 105-бабы бойынша сотқа дейінгі тергеу жүргізіліп жатыр.
