Қазақстанда жыл сайын 39 мыңға жуық адам қатерлі ісікке шалдығады

Бұл жөнінде Алматыда халықаралық мамандардың қатысуымен өтіп жатқан Best of ASKO Саммитінде Денсаулық сақтау министрлігінің штаттан тыс бас онкологы, «Қазақ онкология және радиология ҒЗИ» АҚ басқарма төрайымы, Қазақстан онкологтар қауымдастығының президенті Диляра Қайдарова айтты.

Оның сөзінше, онкологиялық ауруға шалдығатындардың 90 пайызы ер азаматтар.

– Қазақстан онкологиялық аурулар бойынша әлемде 54 орында тұр. Ал өлім-жітімде үшінші орында. Онкологиялық ауруға шалдығатындар жыл сайын көбейіп жатыр,- дейді Диляра Қайдарова.

Онының айтуынша, онкологиялық сырқаттанушылық құрылымында бірінші орында – сүт безі обыры, екінші орында – өкпе обыры, үшінші орында – колоректальды обыр, төртінші орында – асқазан обыры тұр. 

Ал өлімге әкеп соғатындардың ішінде  бірінші орында – өкпе обыры, екінші орында – асқазан обыры, үшінші орында – колоректальды обыр, және төртінші орында – сүт безі обыры тұр,- дейді онколог.

Өткен жылмен салыстырғанда республика бойынша қатерлі ісікке шалдыққандар 4,7%-ға өскен.

– Қазіргі уақытта қатерлі ісік ауруын ерте анықтау 29 пайызды құрайды. Яғни, әрбір үшінші науқас бізге 0 және 1 обырдың сатыларымен келеді, бұл жалпы бізді қуантады. Жақсы көрсеткіш – онкологиялық аурулардан болатын өлім-жітімнің төмендеуі. Сонымен қатар, бес жылдық өмір сүру көрсеткіші жақсарды. Қазір диспансерлік есепте 200 мыңнан астам онкологиялық науқас болса, олардың 55 пайызы 5 жыл және одан да көп өмір сүруде. Бұл жақсы көрсеткіш. Дегенмен, барлық өңірлерде онкологиялық аурулардың саны артқан. Мысалы, 2018 жылы бізде 32 мыңға жуық жаңа қатерлі ісік ауруы анықталса, жарты жылдың өзінде онкологиямен 39 мың жаңа жағдай тіркелді,- деді Диляра Қайдарова. Саммитке қатысушылар қатерлі ісіктің алдын алуда Қазақстанда атқарылған істер мен атқарылуы тиіс шараларды, сондай-ақ, әлемдегі озық тәжірибелерді ортаға салып, біліктілік алмасады.