Шымкентте Қаңтарда адамдарды атқандар жазаланған жоқ
Шымкенттегі Қаңтар оқиғасы кезінде қаза болғандардың ата-аналары мен туыстары қала әкімдігі алдындағы алаңға барып, балаларын атқан және атуға бұйрық бергендерді тауып, жазалауды талап етті,- деп хабарлайды Азаттық сайты.
Әкімдік алдына таңертеңнен бастап жиналған наразылар Қаңтар оқиғасында қайтыс болғандардың суреттерін алаң шетіндегі орындыққа тізіп қойып, плакат ұстап тұрды.
- Оқ атуға бұйрық берген жедел штаб қайда? Бізге жауап берсін. Бәрімізге балаларымыздың өлімі жұмбақ. Баламды алаңда атты ма, жертөлеге алып барып ұрып өлтіріп, атты ма? Әлі күнге баламның киімі қайда екенін білмеймін. Балам қайда қайтыс болды, неге жауап бермейді? - деді марқұм Бағлан Шәріпбайдың анасы Әйкен Қалықұлова.
Шымкенттегі Қаңтар оқиғасы кезінде қала әкімдігі жанынан жедел штаб құрылып, дүрбелең кезінде жұмыс істеген еді.
Наразыларға қала әкімдігінің қызметкерлері келіп, жиынға рұқсатсыз шыққандарын, тоқтатпаса әкімшілік шара қолданылатынын ескертті. Бірақ жиналғандар әкімдік алдындағы алаңға көрпе-төсек әкеліп алды. Талаптары орындалмаса үш күн түнеп, әрі қарай Астанаға жолға шығып, президент Тоқаевқа баратынын мәлімдеді.
Ресми мәлімет бойынша Шымкентте Қаңтар оқиғасында 20 адам оққа ұшқан. Өлгендердің әрбірі бойынша қылмыстық іс қозғалғанымен кейін қысқартылған. 120-дан астам адам ауруханаға түсіп, оның 73-іне оқ тиген.
Байланысты жаналықтар
MalimBlocks
