7 мамыр – Отан қорғаушылар күні және 9 мамыр – Жеңіс күні қарсаңында Шымкент көшелерінде үздік сарбаздар бейнеленген билбордтар ілінді. Ата-анасының мақтанышына айналған, Шымкент қаласынан әскерге шақырылған үздік сарбаздардың бейнесі ілінген билбордтардың мақсаты – Отан алдындағы борышын абыроймен атқарып жүрген азаматтардың ісін жастарға үлгі ету. Шымкент қалалық Қорғаныс істері жөніндегі департаменті ұйытқы болған бұл бастаманы тұрғындар қошеметпен қарсы алды.
Ал қалалық әкімдіктің хабарлауынша, 7 мамыр – Отан қорғаушылар мерекесі қарсаңында соғыс ардагерлеріне теңестірілген азаматтарға (Ауғанстанға жіберілген әскери міндеттілер, 1986-1987 жылдары Чернобыль атом электр станциясындағы апаттың зардаптарын жоюға қатысқан адамдар, Семей полигоны ядролық қаруды сынаудың салдарынан мүгедек болған, радиациялық апаттар мен авариялардан зардап шеккендерге) 36 АЕК (105 012 теңге) көлемінде ақшалай көмек аударылмақ.
Сондай-ақ, Шымкентте 9 мамыр – Жеңіс мерекесіне орай әр қарт майдангерге жыл сайынғы бір реттік ақшалай төлемдер түріндегі әлеуметтік көмек – 360 АЕК яғни, 1 050 120 теңгеден беріліпті. Қалалық жұмыспен қамту және әлеуметтік қорғау басқармасының мәліметінше, қаражат барлық соғыс ардагерлерінің есеп-шоттарына толығымен аударылған. Шымкент қаласында қазіргі таңда Ұлы Отан соғысының 21 ардагері тұрады.
