Қазақстандық «Қайрат» футзал клубы 2024/25 жылғы УЕФА Чемпиондар лигасының «Төрттік финалына» жолдама алды, деп хабарлайды Malim.kz.
Енді алматылық команда испаниялық «Пальма» мен «Картахена», сондай-ақ, португалиялық «Спортинг» клубтарымен бас жүлде үшін таласады.
Турнирдің Элиталық кезеңінде 16 команда төрт топқа бөлініп, төрт жолдама сарапқа салынды. Қазақстан атынан «Семей» мен «Қайрат» клубтары қатысты.
«Семей» екі жеңісіне қарамастан, өз тобында екінші орын алып, жарысты жалғастыра алмады. Ал бірінші орынға «Пальма» клубы ие болды.
«Қайрат» керемет ойын өрнегін көрсетіп, үш кездесудің үшеуінде де жеңіске жетіп, топтық кезеңнен үздік шықты. Соңғысында Загребтің «Динамосын» 5:1 есебімен ойсырата ұтты. Осылайша, алматылық ұжым Элиталық раунд аяқталмай жатып-ақ «Төрттік финалға» қатысу құқығына ие болды.
«Төрттік финал» 2025 жылдың 1-4 мамыры аралығында турнир қатысушыларының бірінің алаңында өтеді. Жарыстың нақты өтетін орны кейін анықталады.
Фото: instagram/afckairat
