АҚШ президенті Дональд Трамп АҚШ Әділет министрлігі мен Бас прокурор Пэм Бондиге бірқатар жоғары лауазымды тұлғалар мен ұйымдардың қаржыгер Джеффри Эпштейнмен байланысына қатысты тергеу жүргізуді тапсырды, деп хабарлайды Malim.kz.
«Бас прокурор Бондимен және Әділет министрлігімен Билл Клинтонның (1993–2001 жылдары АҚШ президенті), Ларри Саммерстің (экономист, 1999–2001 жылдары АҚШ қаржы министрі) және Рид Хоффманның (кәсіпкер, LinkedIn бизнес-әлеуметтік желісінің негізін қалаушы) байланысына қатысты тергеу жүргізуді сұраймын», – деп жазды Трамп Truth Social желісінде.
Америкалық президент тергеудің ықтимал фигуранттары ретінде әлемдегі ең ірі банктердің бірі J.P. Morgan Chase & Co-ны және басқа да көптеген жеке тұлғалар мен ұйымдарды атады.
Бұған дейін Трамп Демократиялық партия өкілдерін Джеффри Эпштейннің оның аты аталатын хаттарын іріктеп жариялап, репутациясына нұқсан келтіруге тырысты деп айыптаған болатын.
«Демократтар хаттарды либералдық БАҚ-қа әдейі таратты, мақсат – президентті қаралау», – деді Ақ үйдің баспасөз хатшысы Кэролайн Левитт.
The Hill мәліметінше, АҚШ Конгресінің Өкілдер палатасының бақылау комитеті жариялаған хаттарда Эпштейн Трамптың оның үйінде «сағаттап болғанын» және қаржыгердің үйінде не болып жатқанын білгенін айтқан.
