Бүгін Түркістан облысы ТЖД-нің 112 пультіне Төлеби ауданындағы "Сайрамсу" шыңынан түскен кезде бес бойжеткеннің адасып кеткені туралы ақпарат келіп түскен, деп хабарлайды Malim.kz.
ТЖМ баспасөз қызметінің хабарлауынша, құтқарушылар 60 шақырым қашықтықты жүріп өтіп, Қасқасу ауылынан 8 шақырым қашықтықта адасқан қыздарды тауып алып, оларды таудан Сайрам-Өгем ұлттық паркінің аумағына аман-есен түсірді.
"Медициналық көмекті қажет етпеген туристер құтқарушыларға алғыс білдірді. ТЖМ тауға шыққан кезде маршрутыңызды зерттеп, жақындарыңызға хабарлап, ауа-райы болжамын тексеріп, байланыс құралдарын өзіңізбен бірге алудың қажеттігін еске салады", делінген хабарламада.
Фото: ТЖМ
