Батыс Қазақстан облысы Жәнібек ауданы Жәнібек ауылында орналасқан Тайыр Жароков атындағы жалпы орта білім беретін мектебінде «Жас сақшы» полиция сыныбының ашылу салтанаты өтті.
Жаңа сыныпқа Ұлы Отан соғысының және ішкі істер органдарының ардагері Сұлтан Бисекеновтің есімі берілді. Ол құқық қорғау саласында ұзақ жылдар бойы абыройлы қызмет атқарып, ерлігі мен мінсіз еңбегі үшін үш мәрте «Қызыл Жұлдыз» орденімен марапатталған. Сонымен қатар, ІІ дәрежелі «Отан соғысы» орденімен, «1941–1945 жж. Германияны жеңгені үшін» медалімен және өзге де мерейтойлық наградалармен марапатталған.
Жобаның негізгі мақсаты – жас ұрпақты патриоттық рухта тәрбиелеу, құқықтық мәдениетін қалыптастыру, тәртіп пен жауапкершілікті арттыру, сондай-ақ құқық қорғау органдарындағы қызметке қызығушылығын ояту.
«Жас сақшы» сыныбына 15 оқушы қабылданды. Олар арнайы бағдарлама бойынша білім алып, құқық қорғау органдары қызметкерлерімен кездесулер өткізіп, түрлі патриоттық және қоғамдық іс-шараларға белсенді қатысады.
Айта кету керек, Батыс Қазақстан облысында «Жас сақшы» полиция сыныбы бесінші рет ашылып, бүгінде табысты жұмысын жалғастыруда.
