Жапонияның Кюсю аралында магнитудасы 7,1 балл болатын қатты дүмпу байқалды, эпицентрі Уки қаласындағы Хикава аймағында болды. Кумамото префектурасында шамамен 48 мың үйде электр жарығы өшіп қалды, пойыз қозғалысы толығымен тоқтатылды, деп хабарлайды Malim.kz.
Жер сілкінісінен тарихи Кумамото сарайының тас қабырғалары ішінара құлады, дегенмен туристер аман-есен эвакуацияланған. Кашима қаласындағы AEON сауда орталығы да қатты зардап шекті, ғимарат ішінара құлап, жарылыс туралы да хабарлар бар.
Ариакэ және Яцусиро шығанақтарының жағалауы үшін цунами қаупі туралы ескерту жарияланды, дегенмен кейінірек ол алынып тасталды. Фукуока, Сага, Нагасаки және Кумамото префектураларының тұрғындарына сақ болу ұсынылды. Жоғары жылдамдықты автомагистральдағы жол өткелдері мен көпірлер елеулі түрде зақымданды, бір жүк пойызы рельстен шығып кетті.
Жапония премьер-министрі Санаэ Такаичи баспасөзге берген мәлімдемесінде адамдардың жарақат алғаны туралы хабарланғанын, кейбір аймақтарда электр жүйесі істен шығып, өрттер шыққанын, жолдар мен көпірлер зақымданғанын, ғимараттар құлағанын растады. Кемінде 50 адамның жарақат алғаны туралы бір ауруханадан хабарланды, жылдам пойыздың ішінде де жолаушылар зардап шеккен.
Атом электр станцияларында ешқандай ауытқу байқалмағаны, радиация деңгейі өзгермегені хабарланды. Дүниежүзінің ірі жарты өткізгіш өндірушісі TSMC Кюсюдегі зауытынан қызметкерлерін сақтық шарасы ретінде эвакуацияласа, Sony компаниясы да жағдайды тексеріп жатыр.
Бұл 2016 жылдың сәуірінен кейінгі ең күшті жер сілкінісі, сол кезде дүлей апаттан 275 адам қаза тауып, 2739 адам жарақат алған, соның ішінде Кумамото сарайы да қатты зақымданған болатын.
