Қазақстанда 1 маусымнан бастап жазғы шиналар маусымы ресми түрде басталады. Осы күннен кейін көлікте қысқы шиналарды пайдалану әкімшілік жауапкершілікке әкелуі мүмкін, деп хабарлайды Malim.kz.
Қазақстан Республикасының Әкімшілік құқық бұзушылық туралы кодексіне сәйкес, маусымға сәйкес келмейтін шиналарды қолданғаны үшін 5 АЕК көлемінде айыппұл қарастырылған. Ал бір жыл ішінде осындай заңбұзушылық қайталанса, айыппұл мөлшері 20 АЕК-ке дейін өседі.
«Дөңгелекті көлік құралдарының қауіпсіздігі туралы» техникалық регламентке сәйкес, жазғы шиналардың протектор тереңдігі кемінде 1,6 мм болуы тиіс. Мамандар 5-6 жылдан асқан шиналарды пайдаланбауға кеңес береді, өйткені уақыт өте келе олардың серпімділігі төмендеп, жолдағы қауіпсіздік көрсеткіштері нашарлайды.
Қысқы шиналар +7°C-тан төмен температурада тиімді жұмыс істеуге арналған. Ауа температурасы тұрақты түрде осы көрсеткіштен жоғарылаған кезде олардың жолға жабысуы нашарлап, тежеу жолы ұзаруы мүмкін.
Қазақстанда жүргізушілер көбіне қысқы шиналарды наурыздың соңы мен сәуірдің басында ауыстырады. Дегенмен, заң бойынша қысқы шиналармен 1 маусымға дейін жүруге рұқсат етіледі.
Мамандар маусымдық ауыстыру кезінде қысқы шиналарды дұрыс сақтауға кеңес береді. Ол үшін шиналарды жуып, кептіріп алған жөн. Сақтау орны құрғақ, салқын әрі күн сәулесі тікелей түспейтін жерде болуы керек. Дискісіз шиналарды көлденеңінен қатарлап жинаған дұрыс, ал дискімен бірге сақталатын шиналарды тік күйде қойып, мезгіл-мезгіл айналдырып тұрған жөн.
