Украина президенті Владимир Зеленскийдің айтуынша, украин делегациясы бүгін АҚШ-та Дональд Трамп командасымен келіссөздерді жалғастырады, деп хабарлайды Malim.kz.
Негізгі мақсат — АҚШ президентінің арнайы өкілдері Стив Уиткофф пен Джаред Кушнердің Ресей президенті Владимир Путинмен Мәскеуде өткен кездесуінде не айтылғанын анықтау.
Бұған дейін Уиткофф, Кушнер және Украина Ұлттық қауіпсіздік және қорғаныс кеңесінің хатшысы Рустем Умеров кездесуінің Майамиде өтетіні хабарланған.
«Біздің міндетіміз – Ресейдегі келіссөздерде не айтылғанын, Путин соғысты созу және Украинаға, бізге, тәуелсіздігімізге қысым жасау үшін тағы қандай себептер тапқанын толық білу», — деді Зеленский.
«Украина оқиғалардың кез келген даму нұсқасына дайын. Әрине, біз барлық серіктестерімізбен барынша конструктивті жұмыс істейміз, өйткені бейбітшілік орнауы керек және ол лайықты бейбітшілік болуы тиіс. Тек лайықты бейбітшілік қана нақты қауіпсіздік береді», — деп қосты Украина президенті.
