Австралияда 19 жастағы жігіт ұлу жеп, 420 күнге комаға түскен, деп хабарлайды Malim.kz.
Mirror басылымының жазуынша, қайғылы оқиға достар арасындағы қалжыңға құрылған бәстен басталған. Сидней қаласында тұратын, болашағынан үміт күттірген жас регбиші Сэм Баллард достарымен бір кеште отырған кезде террасада жүрген ұлуды байқайды. Сол сәтте ол бәске келісіп, ұлуды жұтып қойған.
Алайда ол ұлудың қауіпті паразит – "егеуқұйрық өкпе құртымен" зақымданғанын білмеген. Бұл паразит әдетте егеуқұйрықтардың ағзасында өмір сүреді және олардың нәжісі арқылы таралып, ұлулар мен шырыштарға жұғады.
Бірнеше күннен кейін Сэмнің денсаулығы күрт нашарлап, аяқтарында қатты ауырсыну пайда болған. Кейін дәрігерлер оған миға әсер ететін паразиттік инфекция диагнозын қойған. Ауру асқынып, жас жігіт 420 күнге комаға түскен.
Дәрігерлер оны комадан шығарғанымен, Сэм толықтай сал болып қалған. Ол құрысу ұстамаларына ұшырап, өздігінен тамақтана алмайтын күйге түскен.
Өкінішке қарай, Сэм Баллард 2018 жылы 28 жасында көз жұмды. Бұл оқиға қарапайым қалжыңның қандай ауыр салдарға әкелуі мүмкін екенін көрсетті.
