Ресей президенті Владимир Путин Украинадағы соғыс қимылдарын 8-10 мамыр аралығында біржақты түрде тоқтататынын мәлімдеді. Бұл туралы 28 сәуірде Кремльде жарияланған ресми мәлімдемеде айтылды, деп хабарлайды Malim.kz.
Кремльдің түсіндіруінше, бұл шешім Екінші дүниежүзілік соғыстағы Германия үстінен Жеңістің 80 жылдығын мерекелеуге байланысты қабылданған.
«Ресей Федерациясы Қарулы күштерінің Жоғарғы Бас қолбасшысы Владимир Путиннің шешімімен, гуманитарлық мақсаттарды негізге ала отырып, 80 жылдық Жеңіс мерекесі күндері 7-нен 8 мамырға қараған түні сағат 00:00-ден бастап, 10-нан 11 мамырға қараған түні сағат 00:00-ге дейін Ресей тарапы атысты тоқтататынын жариялайды», — делінген мәлімдемеде.
Құжатқа сәйкес, Ресей Украинадағы барлық әскери іс-қимылды тоқтатады. Мәскеу Киевті де осы мысалды ұстануға шақырды. Алайда, егер Украина тарапы бітімді бұзса, Ресей Қарулы күштері тиісті әрі тиімді жауап қайтаратынын Кремль мәлімдеді.
Бұған дейін Ресей Пасха мерекесіне орай 19-21 сәуір аралығында атысты тоқтату туралы біржақты шешім қабылдаған болатын. Украина президенті Владимир Зеленский сол кезде бітімге қосылуға келісіп, оны ұзартуды ұсынған еді. Бірақ Зеленский Мәскеуді Пасха бітімін екі мыңнан астам рет бұзды деп айыптаған.
Соған қарамастан, Зеленский Мәскеуге жаңа бастама ұсынды:
30 күнге азаматтық инфрақұрылымдарға дрондар мен зымырандармен соққы беруді тоқтату, әрі бұл мерзімді ұзарту мүмкіндігін қарастыру.
Алайда 21 сәуірде Ресей Украина аумағына қайтадан дрон соққыларын бастаған.
Фото: Vyacheslav Prokofyev/Sputnik/Reuters
