Алматы қаласының тұрғыны SIM-карталарды заңсыз тіркеу схемасына қатысқаны үшін сот үкімімен жазаланды, деп хабарлайды Malim.kz.
Бұған дейін полиция әйелді ұстап, одан әртүрлі операторлардың көп мөлшердегі SIM-карталарын, сондай-ақ оларды белсендіруге пайдаланылған мобильді құрылғыларды тәркілеген.
Алматы қалалық полиция департаментінің мәліметінше, ол интернеттегі «қашықтан табыс табу» туралы хабарландыруға жауап беріп, белгісіз кураторлардың нұсқауымен әрекет еткен. Ақшалай сыйақы үшін әйел SIM-карталарды сатып алып, оларды танымал мессенджерлерде тіркеп, растау кодтарын үшінші тұлғаларға беріп отырған. Белсендірілген нөмірлер кейін қылмыстық схемаларда, соның ішінде алаяқтық қоңыраулар жасау үшін пайдаланылған.
Сот шешімімен алматылық әйел үш жылға бас бостандығынан айырылды.
Полиция өкілдері атап өткендей, «SIM-карта операторлары» интернет-алаяқтық тізбегіндегі маңызды буындардың бірі болып саналады. Көпшілік мұндай «жұмысты» зиянсыз деп қабылдағанымен, іс жүзінде қылмысқа сыбайлас болып шығады. Әрбір берілген растау коды – әлеуетті алаяқтық әрекеттің бір бөлігі.
