Алматыда Абай алаңында Қазақстан Республикасының Конституциясының 30 жылдығына арналған төрт сағаттық мерекелік концерт өтті, деп хабарлайды Malim.kz.
Іс-шара Мемлекеттік әнұранның орындалуымен басталды. Абай алаңындағы кеш ерекше бірлік пен мерекелік көңіл-күйге толы болды.
Алғашқы сәттен-ақ көрермендер өнерпаздарға қосылып, ән шырқады, әрбір өнерді ду қол шапалақпен, ерекше қошеметпен қолдады.
Бірнеше буынға ортақ сүйікті әндер мыңдаған адамның даусымен бір арнаға қосылып, ерекше әсер сыйлады.
Концертке көптеген алматылықтар отбасымен келді – ата-аналар балаларымен, ата-әжелер немерелерімен, жастар достарымен бірге жиналып, мерекелік көңіл-күйді жақындарымен бөлісті.
Бағдарламада әр буын өкілдері бас қосты: халық әртістері, опера әншілері, домбырашылар, эстраданың жас жұлдыздары, би ұжымдары мен этно-ансамбльдер көрермендерге ерекше әсер сыйлады. Бұл кеште сахнада Роза Рымбаева, Тамара Асар, Жанар Айжанова, Айгүл Қосанова, Жәмила Серкебаева, Мөлдір Әуелбекова, IL Canto квартеті, «МузАрт Life» тобы, Әли Оқапов, Temirlan & Yernat, Зарина Алтынбаева, Төлеген Рахымбаев, Мұса Сапаралы, Игорь Благодарный, Диана Шарапова, Рүстем Нұржігіт, Ақбота-Нұр Сейтмағанбет, Інжу Әнуарбек, Мақсат Базарбаев, Димаш Дәулетов, Өктем Алтаев, Лара Рысбай, Асхат Тарғын, Бейбітгүл Нұрымхожина, «Арқайым» дуэті, Абик Жексен, Дәурен Байбөрі, Талғат Күзембаев, Ерназар Жұбан өнер көрсетті.
Сонымен қатар «ASU» фольклорлық-этнографиялық ансамблі, «Сазген сазы» этно-ансамблі және AL Jazz Symphony эстрадалық-симфониялық оркестрі сахнаға шықты.
Көрермендерге ерекше сый ретінде «Жаңа ғасыр» театры ашық аспан астында «Алматы – махаббатым» спектаклін қойып, жұртшылықтың зор ықыласына бөленді. Кештің қорытындысында хедлайнерлер – Yenlik пен Қайрат Нұртас өнер көрсетіп, концертті түйіндеді. Жалпы мерекелік іс-шараны 10 мыңнан астам адам тамашалады.
Фото: Алматы әкімдігі
