Түркістан облысында өзін Қаржылық мониторинг агенттігінің қызметкерлері ретінде таныстырған екі адам медициналық ұйым басшысын қылмыстық жауапкершілікке тартамыз деп қорқытып, одан 15 млн теңге талап еткен, деп хабарлайды Malim.kz.
Қаржылық мониторинг агенттігінің мәліметінше, күдіктілер медициналық ұйымда заң бұзушылықтар анықталғанын айтып, оның басшысын қылмыстық жауапкершілікке тартумен қорқытқан. Ал ақша берген жағдайда жауапкершіліктен босатуға уәде берген.
Күдіктілер басшыдан 15 млн теңге талап етіп, оның 5 млн теңгесін алып үлгерген. Кейін қалған 10 млн теңгені беруді талап еткен.
8 тамызда Түркістан облысы бойынша Экономикалық тергеп-тексеру департаментінің қызметкерлері Қаржылық мониторинг агенттігінің Өзіндік қауіпсіздік департаментімен бірлесіп жүргізген жедел операция барысында күдіктілерді қылмыс үстінде ұстады.
Сот олардың екеуіне де қамауда ұстау түріндегі бұлтартпау шарасын санкциялады. Қазір сотқа дейінгі тергеу жалғасып жатыр.
Қаржылық мониторинг агенттігі азаматтарды қырағы болуға шақырды. Агенттік қызметкерлерінің жауапкершілікке тартамыз деп қорқытып немесе қылмыстық жауапкершіліктен босатуға уәде беріп, ақша талап етуі заңсыз екенін ескертті.
Осындай жағдайға тап болған азаматтар Қаржылық мониторинг агенттігінің 1458 Call-орталығына хабарласа алады.
