АҚШ өткен сенбіде Ормуз бұғазында Панама туы астындағы сауда кемесіне жасалған дрон шабуылына жауап ретінде Иран аумағына жаңа әуе соққыларын жасады, деп хабарлайды Malim.kz BBC-ге сілтеме жасап.
Бірнеше сағаттан кейін Иран жауап ретінде Бахрейн мен Кувейттегі америкалық әскери базаларға соққы бергенін мәлімдеді.
Бұл – бір тәулік ішіндегі екінші өзара шабуылдар легі. Екі елдің көшбасшылары екі аптаға жетпейтін уақыт бұрын өзара түсіністік туралы меморандумға қол қойғанына қарамастан, АҚШ пен Иран бір-біріне соққы жасауды жалғастыруда. Тараптар бір-бірін атысты тоқтату режимін бұзды деп айыптап отыр.
Жексенбіге қараған түні АҚШ-тың Орталық қолбасшылығы (CENTCOM) Ормуз бұғазындағы халықаралық кеме қатынасына қарсы «жалғасып жатқан агрессияға» жауап ретінде Иран аумағындағы 10 нысанға соққы жасалғанын хабарлады. Нысаналар қатарында әскери техникалар шоғырланған орындар, байланыс жүйелері, әуе қорғанысы объектілері және ирандық дрондар сақталған қоймалар болған.
АҚШ президенті Дональд Трамп бұл шабуылдар Иранның маусым айының ортасында қол жеткізілген атысты тоқтату туралы келісімді бірнеше рет бұзуына жауап болғанын айтты.
Оның сөзінше, америкалық ұшақтар Иранның зымыран және дрон қоймаларына, сондай-ақ жағалаудағы радиолокациялық станцияларына соққы жасаған.
Трамп сондай-ақ, егер Иран келісімді сақтаудан бас тарта берсе, АҚШ әскери іс-қимылдарды күшейтуі мүмкін екенін ескертті.
CENTCOM мәліметінше, Иранға келісімді сақтау мүмкіндігі берілгенімен, сенбі күні Панама туы астындағы M/T Kiku танкеріне дрон шабуылын жасап, бұл мүмкіндікті пайдаланбаған.
Ал жексенбі күні таңертең Иран АҚШ-тың түнгі әуе шабуылына жауап ретінде америкалық әскери базаларға соққы жасағанын мәлімдеді.
