АҚШ соты "Америка дауысы" радиосының хабар таратуын тоқтату туралы Дональд Трамп әкімшілігінің шешімін заңсыз деп танып, бұл БАҚ-тың 1042 қызметкерін жұмысына қайта алуды міндеттеді.
Шешім қабылдаған АҚШ-тың Колумбия округі бойынша аудандық сотының судьясы Ройс Ламберт америкалық билікке бір апта ішінде шешімді орындап, «Америка дауысының» эфирін қайта қосуды тапсырды.
Президенттік мерзімі басталғаннан бірнеше апта өткен соң Дональд Трамп «Америка дауысының» жұмысын тоқтатуды бұйырған болатын. Оның әкімшілігінің шенеуніктері бұл медианы біржақты және жаңалықтарды солшыл көзқарас тұрғысынан жариялайды деп айыптады.
Ақ үй сондай-ақ федералды қаржыландыру алатын басқа да америкалық БАҚ-тардың жұмысын барынша қысқартуды тапсырды.
АҚШ-тың Жаһандық медиа агенттігінің (USAGM) — «Америка дауысы», Азаттық радиосы және Radio Free Asia сияқты ұйымдарды қадағалап, қаржыландыратын құрылымның — басшысы болып Кэри Лейк тағайындалды.
Осыдан кейін Лейк «Америка дауысының» мыңнан астам қызметкерін қосымша хабарламаға дейін ақылы демалысқа жіберді.
Ұзаққа созылған сот дауы
«Америка дауысының» журналистері өздерінің сөз бостандығына қатысты конституциялық құқықтарының бұзылғанын айтып, сотқа шағым түсірді.
Шамамен бір жыл бұрын, 2025 жылдың 29 наурызында, федералды судья Пол Откен Дональд Трамп әкімшілігіне «Америка дауысының» жұмысын тоқтату процесін уақытша тоқтатуды міндеттеген еді.
