Абиба Әбужақынова сүйінші жаңалығымен бөлісіп, тұрмысқа шығатынын жариялады, деп хабарлайды Malim.kz.
Қазақстан әйелдер құрамасының көшбасшысы әлеуметтік желідегі парақшасында сәнді кешкі көйлекпен түскен суретін жариялап, қалыңдық сақинасын көрсетті.
Сонымен қатар, кадрлардың бірінде қатаң үлгідегі костюм киген, қолында қызыл раушан гүлдерінің үлкен шоғын ұстаған ер адамның спортшының қолынан ұстап тұрғанын көруге болады. Алайда Әбужақынова болашақ жарының жүзін көпшілікке көрсетпеген.
«Мен “иә” дедім!» – деп жазды спортшы жазбасында.
Айта кетейік, Абиба Әбужақынова – Қазақстан әйелдер дзюдо құрамасының көшбасшысы. 2026 жылдың наурыз айындағы жағдай бойынша ол 48 келіге дейінгі салмақ дәрежесінде Халықаралық дзюдо федерациясы рейтингінде екінші орында тұр.
Спортшының еншісінде 2025 жылы Будапешт қаласында өткен әлем чемпионатының күміс жүлдесі, сондай-ақ Ташкент (2022) және Абу-Даби (2024) қалаларындағы әлем біріншіліктерінің қола медальдары бар.
