НАТО-ның Бас хатшысы Марк Рютте Киевтегі баспасөз конференциясында Батыс Ресей тарапынан жаңа агрессия болған жағдайда Украинаға қауіпсіздік кепілдіктерінің үш деңгейін қарастырып отырғанын мәлімдеді, деп хабарлайды Malim.kz ВВС-ге сілтеме жасап.
Оның айтуынша, бірінші деңгей — серіктес елдердің қаржыландыруымен қолдау көрсетілетін «күшейтілген украин армиясы» болмақ.
«Егер ресейліктер Украинаға қайтадан шабуыл жасауға шешім қабылдаса, ол, сөзсіз, қорғаныстың алғашқы шебі болады. Біз бәріміз украин әскерінің өзін-өзі қорғауға дайын болуын қамтамасыз етуге міндеттіміз», — деді Бас хатшы.
Екінші деңгей — «француздар мен британдықтар біріктірген шешімділер коалициясы», — деп атап өтті Рютте.
Алайда ол коалицияның шабуыл болған жағдайда қалай әрекет ететінін нақтыламады.
«Ал үшінші деңгей — жазда қосылуға ниетті екенін айтқан Америка Құрама Штаттары», — деді Солтүстік Атлантика альянсының басшысы.
Бұған дейін НАТО бас хатшысы Ресейдің бейбітшілікке дайын еместігін айтқан еді.
