Магистратураға түсуге арналған кешенді тестілеуді 39 мыңнан астам адам тапсырды. Олардың 43%-ы шекті балл жинады. Орташа көрсеткіш – 75, ең жоғары балл – 132. Бұл туралы Ғылым және жоғары білім министрлігі мәлімдеді, деп хабарлайды Malim.kz.
Тестілеу қорытындысы бойынша 149 қатысушының нәтижесі жойылған. Оның ішінде 101 оқуға түсуші смартфон, шпаргалка және басқа да тыйым салынған заттарды алып өтуге тырысқаны үшін тест тапсыру мүмкіндігінен айырылған. Кешенді тестілеу кезінде ереже бұзғаны үшін 41 адам аудиториядан шығарылып, нәтижелері жойылған. Кешенді тестілеуге кіргізудің үш деңгейлі жүйесінің арқасында 3 бөгде тұлға анықталған. Сондай-ақ, тестілеу бейнежазбаларын қайта тексеру нәтижесінде 4 адамның балы жойылған. Жалпы, ережебұзушылық өткен жылмен салыстырғанда (2023 жылы – 281) шамамен екі есеге азайған.
154 білім беру бағдарламасы тобы бойынша республикалық апелляциялық комиссияға 16 мыңнан астам өтініш, оның ішінде мазмұны бойынша 15 мыңнан астам, техникалық себептерге байланысты 902 өтініш түсті. Апелляциялық комиссияның шешімімен 152 бірегей тест тапсырмасы қанағаттандырылды. Оның ішінде, мазмұны бойынша – 125, техникалық себептерге байланысты – 27 тапсырма, деп жазылған министрлік мәлімдемесінде.
Айта кетейік, ғылыми-педагогикалық бағыт бойынша магистратураға түсу үшін кемінде 75 балл, бейіндік бағыт бойынша кемінде 30 балл жинау қажет.
Жалпы, магистратурада оқуға 13 мың грант бөлінген.
Грант конкурсына құжаттарды қабылдау 12-15 тамыз аралығында жүзеге асырылады, ал грант иегерлерінің тізімі 25 тамызға дейін жарияланады. Болашақ магистранттардың оқуға қабылдануы 28 тамызда аяқталады.
Фото: pexels.com
