«Хабар» телеарнасының «Бірақ...» ток-шоуы жабылады. Бұл туралы Мәдениет және ақпарат министрі Аида Балаева хабарлады.
«Мемлекеттік идеологияны жүргізіп отырған мемлекеттік телеарна бұндай олқылыққа жол бермеуі тиіс еді. Ең алдымен, редакция барлық этикалық норманы сақтап, отбасылық-тұрмыстық зорлық-зомбылық пен арандатушылыққа жол бермеуге, кейіпкерлерді көпшілік алдында қорламау қажет еді. Сондықтан телеарна редакциясына бұл үлкен сабақ болады деп санаймыз. Аталған ток-шоу жабылады», - деп жазды Аида Балаева.
Министрдің айтуынша, 11 наурыздан бастап «Хабар» арнасында отбасындағы әлеуметтік мәселелерді көтеріп, оны шешуге бағытталған «Бірақ...» бағдарламасының шығарылымы ұйымдастырылды.
«Алайда тікелей эфирде берілген шығарылымда редакция бағдарламаның діттеген мақсатына жете алмай, кейіпкерді жаңылыстыру арқылы қоғамда түрлі пікір туындатты. Отбасылық құндылықтарды насихаттау, ана мен баланы қорғау жөніндегі қызметті үйлестіру, отбасылық-тұрмыстық зорлық-зомбылыққа қарсы іс-қимылды насихаттау министрліктің басты міндеттерінің бірі», - деді ол.
Фото: бағдарламадан скриншот
