Әлеуметтік желілерде 15 қыркүйектен бастап карантиндік шектеулер мен медициналық бетперде кию режимі енгізіледі деген ақпарат тараған болатын.
Осыған қатысты ДСМ Санитариялық-эпидемиологиялық бақылау комитеті телеграм-арнасында мәлімдеме жасады. Комитеттің хабарлауынша, бұл ақпарат шындыққа жанаспайды. 15 қыркүйекте тек тұмауға қарсы вакцинация жүргізіле басталады екен.
- ҚР Бас мемлекеттік санитариялық дәрігерінің міндетін атқарушының эпидемиялық маусым кезеңінде профилактикалық және эпидемияға қарсы іс-шараларды жүргізуді көздейтін қаулысына сәйкес ағымдағы жылғы 15 қыркүйектен бастап тұмауға қарсы вакцинация жүргізу басталады. Маска кию режимі тек медициналық ұйымдардың қызметкерлері үшін енгізіледі. Коронавирус инфекциясының жағдайы бақылануда. Азаматтарды ресми ақпарат көздеріндегі сенімді ақпаратқа сенуге шақырамыз , - делінген ресми хабарламада.
Сондай-ақ шындыққа жанаспайтын ақпаратты тарататын адамдардың іс-әрекеттеріне құқықтық баға беру үшін материалдар құқық қорғау органдарына берілетіні айтылған.
Фото: Lada.kz
