Юрий Пя Ұлттық ғылым академиясының академигі атағын алды
Ол Нұрсұлтан Назарбаевтың жүрегіне ота жасағанымен танымал
Белгілі кардиохирург Юрий Пяға ҚР Президенті жанындағы ұлттық ғылым академиясының академигі атағы берілді. Ол «Медицина және денсаулық сақтау» бағыты бойынша академик болып сайланды.
Ол Нұрсұлтан Назарбаевтың жүрегіне операция жасағанымен танымал. Сонымен бірге ҰҒА-на ғалым, гинеколог-онколог Диляра Қайдарова да мүше болды.
«Академик-мүшелер ғылым және жоғары білім министрінің 2024 жылғы 23 қыркүйектегі бұйрығымен бекітілген қағидаларға сәйкес Қазақстан Республикасы Президенті жанындағы ҚР ұлттық ғылым академиясы академиктерінің жалпы жиналысының шешімімен сайланды» деп жазды ұлттық академия сайты.
Юрий Пя Таразда тумасы, 1981 жылы Н.И.Пирогов атындағы Мәскеу мемлекеттік медицина институтын бітірген. Мансабын Тулада бастап, одан кейін Қырғызстан мен Түркияда жұмыс істеді. 2003 жылы ол Қазақстанға шақырылды. Назарбаевтың тұсында медицинаның дамуына қосқан үлесі үшін «Қазақстанның еңбек ері» атағына ие болды. Сондай-ақ, еліміздің Тұңғыш Президентінің тапсырмасы бойынша құрылған Астанадағы «Ұлттық ғылыми кардиохирургиялық орталық» АҚ басқарды.
2023 жылдың қаңтар айында Нұрсұлтан Назарбаевтың жүрегіне емдеу-диагностикалық ота жасалды. Кардиохирург Пяның айтуынша, операция жоспарланған және шамамен 2,5 сағатқа созылды. Ол отадан кейін көп ұзамай Назарбаевтың процедурадан кейінгі жағдайы жақсы екенін мәлімдеді.
Фото: otyrar.kz
