«94 жобаның 45-і бас тартты». Экология министрі экологиялық жобалардың неге іске аспайтынын түсіндірді

Экология және табиғи ресурстар министрі Ерлан Нысанбаев бүгінгі Үкімет отырысында экологиялық жобалардың неге іске аспай қалғанын түсіндірді, деп хабарлайды Malim.kz.

Оның сөзінше, мемлекет басшысының тапсырмасын орындау аясында министрлік әкімдіктер ұсынған утильтөлемдер есебінен қаржыландырылатын 232 млрд теңгеге 94 жобадан тұратын пул әзірлеген. Қазір мәлімделген 94 жобаның 45-і бағдарламаға қатысудан бас тартқан.

Әкімдіктер жобаларды толыққанды пысықтап қалыптастыру кезінде қатысуға мүмкіндігі жоқ жобаларды алып тастағанда бұндай жағдай болмайтын еді. Мысалы, осындай бас тартқан жобалардың ең көбі Түркістан және Жетісу облыстарында байқалады. Сонымен қатар, өңірлердің әкімдіктері жобаларды сүйемелдеу бойынша жұмысты тиісті деңгейде жүргізбеді. Әрбір жобаны пысықтау барысында әкімдіктердің жанындағы құрылымдар қажетті деңгейде қолдаған жағдайда құжаттарды тапсыру мерзімдерін және оларды келісу процесін айтарлықтай қысқартуға болар еді, дейді ол.

Министрдің сөзінше, осыған байланысты әкімдіктерге жобаларды іске асырудың жолдарын қайта қаратыру қажет. Сондай-ақ, өткен жылдың наурызында қатты тұрмыстық қалдықтарды сұрыптау және қайта өңдеудің қуатын арттыру бойынша жоспарланған көрсеткіштерге қол жеткізу мақсатында министрлік жергілікті атқарушы органдармен бірлесіп жобалардың қосымша пулын қалыптастыру жұмыстарын қатар жүргізіп отырған. Нәтижесінде бүгінде министрлік әкімдіктер ұсынған жалпы құны 307 млрд теңгеге 65 жобаны қарастырған. Оның ішінде 41 жоба қалдықтарды қайта өңдеуге жатады.

Бүгінде 5 жобаға Өнеркәсіпті дамыту қорына 3,5 млрд теңге бөлінді. Ал жеке инвестицияларды қосқанда жобалардың жалпы құны 5 млрд теңгені құрайды. 60,9 млрд теңгені құрайтын 11 жоба қордың екінші кезеңінде қаралып жатыр. 241,1 млрд теңге тұратын 49 жоба бойынша инвесторлар құжаттарды қордың ескертулеріне сәйкес пысықтап жатыр, деді Ерлан Нысанбаев.

Аталған жобалардың қуаттылығы сұрыптау бойынша жылына 2,2 млн тонна, қайта өңдеу бойынша жылына 1,1 млн тонна. Осы жобалар іске асқан жағдайда 4,5 мыңнан астам жұмыс орнын құруға және 54,6 млрд теңгеге жеке инвестиция тартуға мүмкіндік бермек.

Фото: Үкімет