2025 жылы қанша адам банкрот деп танылды?
Жыл басынан бері 2 мыңнан астам қазақстандық банкрот деп танылды
Жыл басынан бері 2 мыңнан астам қазақстандық банкрот деп танылды, - деп хабарлайды Malim.kz тілшісі.
Орталық коммуникациялар қызметіндегі брифинг барысында Қаржы министрлігі Мемлекеттік кірістер комитеті төрағасының орынбасары Сейілжан Ахметов 2024 жылы азаматтардан банкроттыққа байланысты 83 мың өтініш түскенін, ал 2025 жылдың үш айында бұл көрсеткіш шамамен 37 мыңға жеткенін айтты.
Ең сұранысқа ие рәсім – соттан тыс банкрот, ол азаматтарға банктер, микроқаржы ұйымдары және коллекторлар алдындағы қарыздардан құтылуға мүмкіндік береді.
Былтыр 11 мыңнан астам қазақстандық банкрот деп танылса, 2025 жылдың үш айында бұл сан 2 мыңнан асты.
Бұл ретте елде төлем қабілетін қалпына келтіру рәсімін былтыр13 адам, ал биылғы үш айда 17 адам қолданған.
"Банкрот рәсіміне ең көп өтініш Алматы облысында берілген – 23 мың өтініш, бұл – республика бойынша барлық өтініштің 11,8 пайызы. Ең аз өтініш Ұлытау облысында тіркелген – шамамен 2 мың, яғни 1 пайыз. Банкроттардың орташа жасы – 44. Ең егде банкрот – 1943 жылы туған Шымкент тұрғыны, оның қарызы 370 мың теңге. Ең жас банкрот – 2005 жылы туған Астана тұрғыны, оның берешегі 856 мың теңге", – деді Мемлекеттік кірістер комитеті төрағасының орынбасары Сейілжан Ахметов.
Ең көп қарызы бар банкрот – Астана қаласының тұрғыны, оның берешегі 2,1 миллиард теңге. Ал ең аз қарызы бар банкрот – Солтүстік Қазақстан облысының тұрғыны, оның қарызы 200 мың теңге.
Фото: pixabay.com
