Бауыржан Ысқақов: Президент ұсынған заң мүмкіндігі шектелген банктерді азайтады

Мемлекет басшысы Қасым-Жомарт Тоқаев «Әділетті Қазақстан: заң мен тәртіп, экономикалық өсім, қоғамдық оптимизм» атты Жолдауында банктер туралы жаңа заң қажеттігін айтты. Бұл өз кезегінде банктердің экономикаға көбірек қаржы құюына жағдай жасайтын жол. Қаржыгер Бауыржан Ысқақов жолдауда көтерілген қаржылық саясат мәселелері жүзеге асса, ел қазынасы молыға түсетінін алға тартады.  

«Банктердің экономиканы қаржыландырғанынан гөрі, тұтынушылық несиеге қарай бағыт алып кеткені байқалады. Оны банк арқылы қаржыландырылған шағын және орта бизнес субъектілерінің әлі де аз екенінен аңғаруға болады. Екінші, отандық экономикада бұрыннан қалыптасқан бір ғана лицензиямен жұмыс істейтін басқа да функция атқаруға мүмкіндігі  шектелген банктер  ортасы қалыптасып отыр. Ал әлемнің дамыған мемлекеттерінде шағын және орта бизнесті қаржыландыратын банктерге арналған   заң-ережелер бар. Ірі кәсіпорындарға  банктің тағы да қызығушылық жасайтын арнайы механизмдері іске қосылған. Міне,осы бір жаңашылдықты біздің банктерде жүзеге асырар болсақ, еліміздегі бір орында қалып қойған банктерге тың серпіліс әкелер еді»,-дейді экономист.    

Б.Ысқақов отандық экономиканы еселеу үшін Қазақстан шетелдің табысты банктік жүйелерін нарыққа енгізумен мықтап айналысуға тиіс деп біледі. Бұл ретте ол дамыған елдердің тәжірибесін негізге алуды ұсынады.

«Мәселен, исламдық қаржыландыруды алайық. Сол секілді шариғаттың ілімі, талаптарымен қаржыландырылатын банктер бізде жоқтың қасы. Біріккен араб әмірліктерінде бір ғана заңның шеңберінде банктер дәстүрлі және исламдық құндылықтарды ескеріп жұмыс істеуде. Атап айтқанда,пайыздық мөлшерлеме төмен. Сәйкесінше әр түрлі салаларды қамтып, ел қазынасын қампайтып келеді.  Арнайы банктер туралы заң қабылдау арқылы экономика саласына несие беретін банктер саны артады. Сонымен қатар, сырттан келетін сервистік қызметі жоғары ірі банктердің  Қазақстан экономикасына жұмыс жасауына мүмкіндік береді», -дейді қаржы маманы. 

Фото: inbusiness.kz