Бір жылда 27,7%. Үй бағасы тағы қымбаттады  

Былтырғы сәуір мен биылғы сәуір аралығында пәтерлерді қайта сату бағасы – 27,7%, жаңа тұрғын үйлерді сату құны 20,3% қымбаттады. Ал абаттандырылған баспананы жалға алу төлемі 22,2% көтерілді. Бір айдың ішінде, яғни 2022 жылғы наурызға қарағанда қайта сатуға қойылған баспана құны 1,8% өсіп, шаршы метріне 459 137 теңге шамасында болды. Ұлттық статистика бюросы осындай ақпарат таратты.  

Жаңа тұрғын үйді сату және абаттандырылған тұрғын үйді жалға алу төлемі сәуірде 0,8% жоғарылап, шаршы метріне тиісінше 412 315 теңге және 3 561 теңгені көрсетті.

Қазақстанда баспана бағасы бесінші жыл қатарынан қымбаттап отыр.

Бағаның төмендеуі 2016 жылы ғана тіркелді. Ол кезде жаңа тұрғын үй 3,6% арзандады. 2017 жылы қайта сату нарығындағы шаршы метрдің бағасы 1,6% төмендеді. 

FinReview сарапшылары  алда аса ауқымды өзгеріс күтудің қажеті жоқ деп пайымдайды.  Үйдің қымбаттауы  азаматтардың  өз жинағын құнсызданудан қорғауға деген ұмтылысы мен  инфляция өсіміне тікелей қатысты.  Әдетте нарық экономикасы жағдайында тұрғын үй бағасы инфляция деңгейінен жоғары мәнде өседі. Бірақ қазір баға онсыз да 15-20%-ке қымбат, сондықтан алдымен бағаның реттелуін күту қажет. Алайда ол екіталай, яғни, баспана бағасы арзандамайды. Екінші жартыжылдықта баға 10% шегінде қымбаттайды", - дейді  сарапшылар.