Қазақстанда рубльге сенімсіздік рекордтық деңгейге жетті
2025 жылдың басынан бері ресейлік рубль айтарлықтай нығайды. Қаңтарда оның бағамы 5,16 теңге болса, тамызға қарай 30 пайызға өсіп, 6,72 теңгеге жетті. Қыркүйекте шамамен 6,65 теңге деңгейінде сақталып отыр. Алайда рубльдің қымбаттауына қарамастан, оған сұраныс жоқ — айырбастау пункттері оның жаппай өткізілуін тіркеуде, деп хабарлайды Malim.kz FinProm сарапшыларының деректеріне сілтеме жасап.
Ұлттық банктің мәліметінше, теріс нетто-сату қатарынан 8 ай бойы байқалып келеді. 2024 жылдың қарашасында баланс әлі оң болып — 4,9 млрд теңгені құраса, желтоқсанда минус 4,4 млрд теңгеге түсті, 2025 жылдың қаңтарында — минус 9,5 млрд, ал шілдеде бұл көрсеткіш минус 53,2 млрд теңгеге жетті. Жалпы, қаңтар–шілде аралығында теріс сату көлемі 201,2 млрд теңгені құрады — бұл өткен жылмен салыстырғанда 10 есе көп.
Ұлттық банк төрағасы Тимур Сүлейменовтің айтуынша, Қазақстанда рубль жинақталмайды: Ресеймен теріс сауда балансы және шекаралық өңірлердегі белсенді сауда-саттық нәтижесінде рубль тез қайтып оралады.
Ал экономистер рубльдің Қазақстанда шектеулі түрде қолданылатынын және іс жүзінде «транзиттік» валюта рөлін атқаратынын атап өтеді. Ол елге енгенімен, бірден дерлік доллар мен еуроға айырбасталады.
Сонымен қатар, тиімді бағам Ресейдің шекараға жақын өңірлерінің тұрғындарын Қазақстанға азық-түлік пен киімнен бастап медициналық қызметке дейін сатып алуға ынталандырады. Бұл нарықта рубльдің артық көлемін қалыптастырып, қазақстандықтардың одан құтылуға тырысуына әкеледі.
Фото:depositphotos.com
Ең көп оқылған
