Ұлттық банк базалық мөлшерлемені өзгеріссіз 15,25% деңгейінде қалдырды
Оған Ресейдегі инфляцияның әсер етіп отырғанын мәлімдеді
Ұлттық Банктің ақша-кредит саясаты комитеті базалық мөлшерлемені +/- 1 п.т. дәлізімен жылдық 15,25% деңгейінде белгілеу туралы шешім қабылдады, деп хабарлайды Malim.kz.
Ұлттық банк мәлімдеуінше, желтоқсанда елімізде инфляция 8,6%-ға дейін үдеп, 2024 жылға болжанған 8-9% диапазон шегінде қалыптасты. Оған қызметтер бағасының жоғары өсуі және тамыздан бергі азық-түлікке жатпайтын тауарлар инфляциясының жеделдеуі көп үлес қосты. «Тарифті инвестицияға айырбастау» бағдарламасын іске асыру мен теңгенің әлсіреуі аясында инфляция күш алып тұр.
Сонымен қатар, инфляцияның орнықты бөлігінде өсім сақталып отыр. Ол фискалдық ынталандыру жалғасқандықтан сұраныс тарапынан қысым барын көрсетеді. Желтоқсан айында халықтың инфляциялық күтулері, жоғары құбылмалылықты көрсетіп, қайта өсті.
Әлемдік азық-түлік бағасының жоғары болуына және Ресейде инфляцияның қарқын алуына байланысты сыртқы инфляциялық қысым жоғары болып тұр, деп жазылған ресми хабарламада.
Проинфляциялық тәуекелдер сақталып отыр. Сыртқы ортадан – олар Ресейдегі инфляцияның жоғарылауына байланысты, ал ішкі ортадан – реттелетін бағалар саласындағы реформаның жалғасуына, әлсіреген теңгенің бағаларға әсер етуіне, фискалдық ынталандыру, тұрақсыз инфляциялық күтулер және тұтынушылық кредиттеудің өсуі кезіндегі жоғары ішкі сұранысқа байланысты.
Фото: Ұлттық банк
