Бұл туралы Германияның қорғаныс министрі Борис Писториус мәлімдеді, деп хабарлайды Malim.kz.
Оның айтуынша, Германия әскери-теңіз күштерінің минаны жоюға арналған және командалық-қосымша кемесі Ормуз бұғазын миналардан тазарту мақсатында Бундестагтың ресми мандатын күтпей-ақ Жерорта теңізіне жіберіледі. Бұл болашақтағы орналастыру процесін жеделдетуге мүмкіндік береді.
«Біздің флот миналарды анықтау және залалсыздандыру бойынша өте жақсы дайындалған. Біз дәл осы мүмкіндіктерге сүйенеміз. Ормуз бұғазында еркін және қауіпсіз кеме қатынасын қамтамасыз ету үшін осы бағытта жұмыс істей аламыз», — деді Писториус Rheinische Post басылымына берген сұхбатында.
Парламенттің мандаты қашан берілуі мүмкін деген сұраққа министр бұған дейін депутаттардың мұндай мәселелерде тез әрекет еткенін айтты.
Оның сөзінше, Германия Әскери-теңіз күштерін Таяу Шығысқа орналастырудың басты шарты — әскери қимылдардың тоқтатылуы.
