31 қаңтар, сенбі күні Иранның бірнеше қаласында жарылыстар тіркелді, деп хабарлайды Malim.kz. DW-ге сілтеме жасап.
Жергілікті БАҚ мәліметінше, ең ірі жарылыстардың бірі Парсы шығанағы жағалауында орналасқан Бендер-Аббас портты қаласында болған.
Мемлекеттік телеарнаның хабарлауынша, Моаллем бульвары ауданындағы сегіз қабатты ғимаратта жарылыс болып, екі қабаты қираған. Сондай-ақ бірнеше автокөлік пен дүкендер зақымданған. Оқиғаның нақты себебі әзірге анықталған жоқ. Оқиға орнына құтқару және өрт сөндіру қызметтері жіберілді. Tasnim агенттігінің дерегінше, жарылыс салдарынан бір адам қаза тауып, 14 адам жараланған.
Mehr агенттігі Иранның оңтүстік-батысындағы Ахваз қаласында тұрғын үй кешенінде жарылыс болғанын хабарлады. Расталмаған мәліметтер бойынша, төрт адам қаза тапқан. Қалалық өрт-құтқару қызметінің басшысы оқиғаның себебі газдың таралуы болуы мүмкін екенін мәлімдеді.
Сонымен қатар, БАҚ-та Паранд және Тебриз қалаларында да жарылыстар болғаны туралы ақпарат тарады. Алайда бұл мәліметтерге қатысты ресми растау әзірге жоқ.
