Италияның Коллеферро қаласында, Римнен шамамен 40 шақырым жерде оқ-дәрі шығаратын зауытта күшті жарылыс болды. Оқиға 13 тамызда кәсіпорында өрт шыққан кезде тіркелген. Жарылыс бірнеше шақырым қашықтықтан естілген, деп хабарлайды Malim.kz.
Жарылыс KNDS Ammo Italy компаниясына тиесілі зауытта болған. Кәсіпорын орта және ірі калибрлі оқ-дәрілерді, сондай-ақ қорғаныс саласына арналған өнімдерді шығарады. Алдын ала мәлімет бойынша, жарылыс оқ-дәрі өндірісіндегі оқ-дәрі ұнтағын престеу бөлімінде болған.
Оқиға орнына полиция мен өрт сөндірушілер жұмылдырылды. Он өрт сөндіру тобы мен тікұшақ жұмыс істеген. Зауыттағы 24 қызметкердің барлығы қауіпсіз жерге шығарылған. Алдын ала мәлімет бойынша, қаза тапқандар мен зардап шеккендер жоқ.
Жарылыстың нақты себебі әзірге белгісіз. Полиция мен прокуратура оқиғаның мән-жайын анықтап жатыр.
