Израиль үкіметі Иордан өзенінің Батыс жағалауында тағы 19 еврей қонысын салуды мақұлдады. Бұл туралы 21 желтоқсанда, Израильдің қаржы министрі, ультраоңшыл «Діни сионизм» партиясының жетекшісі Бецалель Смотричтің кеңсесі хабарлады.
Аталған бастаманың авторлары – Смотричтің өзі және Израильдің қорғаныс министрі Исраэль Кац. Осылайша, халықаралық құқықты бұза отырып, Батыс жағалауда салынған еврей қоныстарының саны 69-ға жетуі тиіс. AFP агенттігінің түсіндіруінше, мақұлданған 19 қоныстың бесеуі бұрыннан бар, алайда осы уақытқа дейін Израиль заңдары бойынша ресми түрде танылмаған. Тағы екі қоныс шамамен жиырма жыл бұрын бұзылған, ал қазір қайтадан салынған.
Бецалель Смотричтің айтуынша, бұл шара Палестина мемлекетінің құрылуына жол бермеу үшін қажет, себебі Израиль мұндай перспективаны өз қауіпсіздігіне қатер ретінде бағалайды.
Палестина мемлекетінің мойындалуын әлемнің бірқатар елдері қолдайды. Германия Федеративтік Республикасының канцлері Фридрих Мерц (Fridrich Merz) желтоқсан айының басында Израильге жасаған сапары барысында да мұндай жоспарды құптайтынын мәлімдеді. Алайда Германия қазіргі таңда мұндай мемлекетті тануға дайын емес екенін атап өтті.
Иордан өзенінің Батыс жағалауындағы еврей қоныстары
Израиль Иордан өзенінің Батыс жағалауын 1967 жылғы Алты күндік соғыс кезінде өз бақылауына алған. Халықаралық құқыққа сәйкес, осы палестиналық аумақтарда еврей қоныстарын салу заңсыз болып саналады.
Халықаралық қауымдастықтың наразылығына қарамастан, Израиль соңғы ондаған жылдар ішінде Батыс жағалауда ондаған қоныс салды. Қазіргі таңда бұл аумақта шамамен 500 мың еврей тұрады. Ал палестиналық халықтың саны шамамен 3 миллион адамды құрайды.
БҰҰ деректеріне сәйкес, биылғы жылдың қаңтарынан желтоқсанына дейін Израиль Батыс жағалауда 47 390 тұрғын үй бірлігін жобалап, мақұлдап немесе олардың құрылысына тендер жариялаған. Салыстыру үшін: 2017–2022 жылдар аралығында бұл аумақтағы еврей қоныстары жылына орта есеппен 12 815 тұрғын үйге кеңейтіліп отырған.
ХАМАС-тың Израильге шабуылы және оның салдары
Таяу Шығыстағы жағдай 2023 жылғы 7 қазанда күрт ушықты. Еуропалық одақ пен АҚШ-та террористік ұйым деп танылған ХАМАС қозғалысы Израильге ауқымды шабуыл жасады. Жауынгерлер Израильге жаппай зымырандық соққы беріп, ел аумағына басып кірді және қазіргі Израиль мемлекетінің тарихындағы бейбіт тұрғындарға қарсы ең жаппай қырғынды жүзеге асырды. Шамамен 1200 адам қаза тапты. Сонымен қатар, олар 250-ден астам адамды кепілге алып, Газадағы секторға алып кетті. Кепілге алынғандардың бір бөлігі айырбастау арқылы немесе босатылса, бір бөлігі қаза тапты.
Бұған жауап ретінде Израиль ХАМАС-қа соғыс жариялады. Құрлықтағы операциялар мен Газа секторын бомбалау нәтижесінде 60 мыңнан астам палестиналық қаза тауып, тағы 145 мыңнан астамы жараланған. Мұндай мәліметті ХАМАС бақылауындағы денсаулық сақтау министрлігі келтіреді. Алайда бұл ведомство статистиканы қалай жүргізетінін, атап айтқанда қаза тапқандардың ішінде қанша исламшыл жауынгер болғанын, сондай-ақ ауруханаларда болған палестиналықтардың табиғи себептермен қайтыс болғандары бұл есепке кіре ме, жоқ па – нақтыламайды.
