“Қазсушар“ филиалының директоры мен оның қарамағындағылар қызметінен айырылды

Су ресурстары және ирригация министрлігі жүргізген тексеріс нәтижесінде 29 тұлға әкімшілік жауапкершілікке тартылды. 

Су ресурстары және ирригация министрі Нұржан Нұржігітовтің тапсырмасы бойынша, Ішкі аудит департаменті 9 айда 11 мекемеге аудиторлық тексеру жүргізген.

Мәселен, Жамбыл облысы бойынша "Қазсушар" филиалына жүргізілген тексеріс барысында су ресурстарын заңсыз пайдаланудың 10-ға жуық дерегі мен шаруалармен суармалы су беру келісімшарттарын жасау барысында заңбұзушылықтарға жол берілгені анықтаған болатын. Аудит қорытындысы бойынша мекеме басшысы мен Аса өндірістік аймағының басшысы қызметінен босатылды. Бұдан бөлек, филиал директорының орынбасары мен Қордай, Байзақ, Меркі өндірістік аймақтарының басшылары қатаң сөгіс түрінде тәртіптік жауапкершілікке тартылды.

"Аудит қорытындысы бойынша анықталған барлық заңбұзушылықтарға қатысты материалдар Бас прокуратураға жолданды. Сондай-ақ, министрліктің құзыретті құрылымдары мен ведомстволарына ұсынымдар мен тапсырмалар берілді", - деді Ішкі аудит департаментінің директоры Ғалымжан Молдаш.

Фото: kazvodhoz-krg.kz