СҚО-да 681 млн теңгеге заңсыз криптосауда жасағандарға жаза кесілді

ҚМА Солтүстік Қазақстан облысы бойынша департаменті цифрлық активтерді заңсыз айналымға шығару дерегі бойынша қылмыстық істі тергеуді аяқтады, деп хабарлайды Malim.kz.

Агенттік мәлімдеуінше, үш азамат тиісті лицензиясыз криптовалюта қабылдау және айырбастау операцияларын жүргізген. Олар криптовалюта биржаларынан алынған қаражатты пайдаланып, криптоәмиян арқылы қамтамасыз етілмеген цифрлық активтермен айырбас операцияларын жүзеге асырған. Ел аумағында қызметі тыйым салынған криптобиржалар арқылы жасалған бұл операциялар заңсыз.

Заңсыз айырбас операциялары нәтижесінде схеманы ұйымдастырушылар цифрлық активтерді ұлттық валютаға айырбастаған. Жалпы айналым көлемі 681 млн теңгеден астам. 380 адам осы үш азаматпен криптовалюта бойынша транзакциялар жасағаны анықталды, бұл іс-әрекет банктік шоттардан алынған үзінділермен расталды, деп жазылған агенттік мәлімдемесінде.

Сот үш күдіктіге қатысты шешім қабылдап, оларды 2,5 жылдан 3,5 жылға дейін бас бостандығынан айыру жазасына кесіп, мүліктерін тәркілеуге шешім қабылдаған.

Құны шамамен 400 млн теңгені құрайтын мүлік тәркіленіп, оның ішінде 10 млн теңге көлемінде активтер, 150 млн теңге бағасындағы жылжымайтын мүлік, жалпы құны 213 млн теңге болатын 5 көлік, 12 млн теңге тұратын квадроцикл және қымбат компьютерлік жабдықтар бар.

Мұндай құрылымдар өз клиенттерін сәйкестендірмейді және күдікті операцияларды анықтамайды. Сондықтан, олардың қызметтерін көбіне кибералаяқтар мен есірткі заттарын өткізушілер пайдаланады, деп жазылған агенттік хабарламасында.

Мысалы, осындай схемалар арқылы былтыр 10 миллиард теңгеге есірткі табыстары шығарылған.

Айта кетейік, «Цифрлық активтер туралы» заңға сәйкес елдегі цифрлық активтердің айналымына қатысты кез келген қызмет лицензияны қажет етеді.

Фото: freepik.com