Ресей Қорғаныс министрлігінің мәліметінше, 7 мамырға қараған түні Мәскеу мен елдің 20-дан астам өңіріне украиналық дрондармен жаппай шабуыл жасалған, деп хабарлайды Malim.kz DW-ге сілтеме жасап.
Ведомствоның хабарлауынша, әуе қорғаныс жүйелері түн ішінде ұшақ типіндегі 347 БПЛА-ны атып түсірген. Бұл — Ресей мен Украина арасындағы соғыс басталғалы бергі ең ірі дрон шабуылдарының бірі.
Шабуылдар Белгород, Брянск, Волгоград, Воронеж, Курск, Ростов, Тула, Тверь облыстары, Мәскеу аймағы, Краснодар өлкесі, Адыгея, Қалмақстан және аннексияланған Қырым аумақтарында тіркелген. Сондай-ақ Азов, Каспий және Қара теңіз акваторияларында да дрондар жойылғаны хабарланды.
Мәскеу мэрі Сергей Собяниннің айтуынша, астанаға бағытталған 30-дан астам дрон атып түсірілген. Оқиға орындарында жедел қызмет мамандары жұмыс істеп жатыр.
Ресейлік БАҚ мәліметінше, Мәскеудегі Внуково мен Шереметьево әуежайларында ұшақтарды қабылдау және ұшыру уақытша шектелген. Кей өңірлерде рейстер кешіктіріліп, тоқтатылған.
