Мұнай бағасы АҚШ президенті Дональд Трамптың Иранның америкалық ұсынысқа берген жауабын «мүлде қабылдауға келмейді» деп бағалауынан кейін қымбаттады, деп хабарлайды Malim.kz.
Дүйсенбі күні таңертең Brent маркалы мұнай бағасы 3%-дан астам өсіп, барреліне 104 доллардан асты. West Texas Intermediate (WTI) мұнайы да 3%-дан жоғары қымбаттап, барреліне 98 доллардан жоғары деңгейде саудаланды.
Жексенбі күні ирандық БАҚ Тегеран Вашингтонның соңғы ұсынысына ресми жауап бергенін хабарлады. Құжат Пәкістан делдалдары арқылы жеткізілген.
Иран тарапы қазіргі дипломатиялық кезеңнің нақты сипатта екенін атап өтті. Келіссөздер өңірдегі соғысты толық тоқтату мәселесіне ғана бағытталатыны айтылды.
Тегеран барлық майдандағы, соның ішінде Ливандағы соғысты тоқтатуға және теңіз қатынасының қауіпсіздігін қамтамасыз етуге мүдделі екенін мәлімдеді.
Вашингтонның соңғы ұсынысы соғысты тоқтату, Ормуз бұғазының жұмысын қалпына келтіру және Иранның ядролық бағдарламасын қысқарту мәселелерін қамтыған. Алайда Тегеран ядролық бағдарлама тақырыбын кейінірек талқылауды жөн көреді.
Дональд Трамп Иранның жауабын «мүлде қабылдауға келмейді» деп атады, бірақ нақты қандай тұстарға қатысты екенін ашып айтпады.
