562 миллион теңге: Алматы облысы әкімі қымбат көліктерді бюджет қаражатына не үшін алған?

Алматы облысы әкімдігі жол талғамайтын қымбат көліктерді мемлекеттік сатып алу арқылы сатып алған. Марат Сұлтанғазиев оларды қызметтік сапарларына пайдаланады, - деп хабарлайды Malim.kz тілшісі. 

Журналист Асхат Ниязов Алматы облысы әкімдігінің ашық автотұрағында бірнеше TANK көлігі тұрғанын, ал жеке кіру есігінің жанында Toyota Land Cruiser 300 көлігі тұрғанын байқаған еді.

Әкімдік бұл көліктердің облыс әкімі Сұлтанғазиевтің қызметтік сапарлары үшін пайдаланылатынын растады. Оларды жолсыз аймақтармен және ұзақ қашықтықтарға қатынау үшін сатып алған. Алайда Toyota Land Cruiser 300 көлігінің нақты кімге тиесілі екені туралы сұраққа жауап берілмеді.

"Автокөліктер заңға сәйкес "Мемлекеттік сатып алу туралы" заң аясында ашық конкурс арқылы сатып алынды. Бұл – сатып алу рәсімінің ашық әрі бәсекелестігін қамтамасыз етті", – деді әкім аппараты басшысының орынбасары Ернат Байғалық.

Мемлекеттік сатып алулар сайтындағы ақпаратқа сәйкес Алматы облысы әкімдігі 2023 жылы ең ірі автодилер – Allur компаниясынан жалпы сомасы 562 миллион теңгеге автокөліктер сатып алған. Сонымен қатар, әкім Марат Сұлтанғазиевтің негізгі қызметтік көлігі Kia K900 екені де нақтыланды.

Ал әкімдік ғимаратының күзетшісі журналист Ниязовқа Toyota Land Cruiser 300 көлігімен әкімнің өзі келгенін айтқан. Алайда бұл қымбат көлік нақты кімге тиесілі екені белгісіз.

Қазақстанда Toyota Land Cruiser 300 бағасы қандай?

Қазақстанда Toyota Land Cruiser 300 көлігінің жаңа үлгісінің бағасы жинақталуына байланысты өзгереді. Ресми дилерлердің мәліметінше, оның бастапқы бағасы – 47 690 000 теңгеден басталып, 69 490 000 теңгеге дейін жетуі мүмкін.

Фото: gov.kz