Түркияда "Астана LRT" ЖШС-нің бұрынғы басшысы Талғат Ардан ұсталды, - деп хабарлайды Мalim.kz тілшісі.
2019 жылғы қыркүйекте Қазақстан Республикасының Бас прокуратурасы Түркияның Әділет министрлігіне халықаралық іздеуде жүрген "Астана LRT" ЖШС-нің бұрынғы басшысы, Қазақстан азаматы Талғат Арданды ұстап беру туралы сұрау жіберген болатын.
"Осыған байланысты Түркия Республикасының құзырлы органдары тиісті іздестіру шараларын жүргізген. Биыл ҰҚК оның нақты болған жерін анықтап, кейін Түркияның құқық қорғау органдары Анталья қаласында ұстады", - делінген хабарламада.
Биыл 9 мамырда Анталья қаласының соты Талғат Арданды Қазақстанға депортациялау туралы шешім қабылдады және ол қазіргі уақытта қамауда.
Қазақстанның құзыретті органдары аталған адамды Қазақстанға қайтару бойынша құқықтық рәсімдерді бастады.
Еске салайық, былтыр 11 қарашада Талғат Ардан лауазымдық өкілеттіктерін теріс пайдалану фактісі бойынша сырттай кінәлі деп танылған болатын. Ол бұған дейін өткен мамырда тағы бір рет сотталған. Оны сот шетелде қашып жүрсе де, сырттай 9 жылға бас бостандығынан айырған.
Фото: youtube.com/@astanalrt7686
