Шығыс Қазақстан облысының жолаушы көлігі және автомобиль жолдары басқармасында кадрлық өзгеріс болды. Бұған дейін басқарма жетекшісі болған Данияр Уахитов өз өтінішімен қызметінен кетті.
Облыс әкімдігінің мәліметінше, бұл шешім өңір басшысы Нұрымбет Сақтағановтың тапсырмасына сәйкес, мемлекеттік қызмет саласындағы сыбайлас жемқорлық тәуекелдерін азайту жұмыстары аясында қабылданған.
Шнайдер көпірінде орын алған жол-көлік оқиғасынан кейін құқық қорғау органдарының қатысуымен кешенді тексеріс жүргізілген. Тексеру нәтижесінде басқарманың бұрынғы басшысының заң талаптарына қайшы әрекеттері анықталғаны айтылды.
Бұл факті бойынша түпкілікті құқықтық бағаны уәкілетті органдар береді.
Облыс әкімдігі мемлекеттік қызметтің ашықтығын арттыру, тәртіпті күшейту және жауапкершілікті көтеру бағыты бойынша жұмысты жалғастыратынын хабарлады.
