Мотоцикл жүргізушісі шабуылға ұшырады: полиция жәбірленушіні күзететін болды

Жамбыл облысының Меркі ауданындағы жанармай құю бекетінде болған оқиғаға қатысты Ішкі істер органдары қылмыстық істі тергеп жатыр, - деп хабарлайды Malim.kz тілшісі.

Бұған дейін адвокат Закир Асадов зардап шеккен ер адамға күдіктінің туыстары тарапынан қысым жасалып жатқанын, тіпті ауруханаға келіп жатқанын айтқан. Ол істі адам өлтіруге оқталу бабы бойынша қайта саралап, басқа өңірге беруді талап еткен.

ІІМ не дейді?
Министрліктің мәліметінше, қазір іс ҚР ҚК 293-бабының 3-бөлігі бойынша тергеліп жатыр. Бұл – суық қару қолданылған бұзақылық. Бұл бап бойынша жаза – 7 жылға дейін бас бостандығынан айыру.

Қылмыстық іс Жамбыл облысы Полиция департаментінің тергеу басқармасы өндірісіне қабылданған. Тергеуді жедел жүргізу үшін арнайы жедел-тергеу тобы құрылған.

"Күдіктінің әрекетін қайта саралау мәселесі тергеу амалдары аяқталғаннан кейін және қадағалау органымен келісілген соң қаралады. Сонымен қатар, адвокаттың өтініші бойынша зардап шеккен азаматқа полиция қызметкерлерінен қорғау қамтамасыз етілді", – делінген ІІМ хабарламасында.

Айта кетейік, бұл іс Ішкі істер министрінің тікелей бақылауында.

Оқиға туралы қысқаша:
Бұған дейін Жамбыл облысындағы жанармай құю станциясында мотоциклист пышақталғаны хабарланған. Желіде тараған видеода мотоциклисттің жанармай құюға бет алғаны, ал оның артынан бір ер адам еріп бара жатқаны байқалады. Бір сәтте әлгі адам қалтасынан пышақ тәрізді затты шығарып, бірнеше рет соққы жасайды.

Видеоға қарағанда, олардың арасында бұған дейін жанжал болған. Бірақ шабуыл жасаушының әрекетін зардап шегуші күткен жоқ. Кейін күдікті ақ түсті көлікке отырып, оқиға орнынан кетіп қалған. Жамбыл облысы Денсаулық сақтау басқармасының мәліметінше, 32 жастағы ер адам пышақ жарақаттарымен ауруханаға жеткізілген.

"2024 жылғы 13 сәуір, 16:10-да Меркен аудандық орталық ауруханасының қабылдау бөліміне жеткізілді. Диагноз: оң жақ кеуде және бел тұсынан пышақ жарақаты. Алғашқы медициналық көмек көрсетіліп, тігіс салынды", – деп мәлімдеді басқарманың баспасөз қызметі.

Кейін науқастың амбулаториялық емдеуге жіберілгені хабарланды.

Фото: Видеодан алынған кадр