Қазақстан Түркиядан "Астана LRT"-ның бұрынғы басшысы Талғат Арданды экстрадициялауды сұрады

Қазақстан Түркиядан "Астана LRT"-ның бұрынғы басшысы Талғат Арданды экстрадициялау туралы ресми сұрау жолдады, - деп хабарлайды Malim.kz.

Қазақстанның Бас прокуратурасы Түркияда ұсталған "Астана LRT"-ның бұрынғы басшысы Талғат Арданға қатысты экстрадиция мәселесін түсіндірді.

Бұған дейін Талғат Арданға қатысты Қазақстанның Сыбайлас жемқорлыққа қарсы қызметі Қылмыстық кодекстің "Сеніп тапсырылған бөтен мүлікті иемдену немесе ысырап ету" және "Лауазымдық өкілеттіктерін асыра пайдалану" баптары бойынша қылмыс жасады деген күдікпен іздеу жариялағанын хабарлады. Оған бұлтартпау шарасы ретінде қамауға алу санкциясы қолданылған. Ардан халықаралық іздеуде болған.

Ресми ақпаратқа сәйкес, 2025 жылғы 10 мамырда Интерполдың Ұлттық орталық бюросы арналары арқылы Арданның Түркия Республикасының аумағында ұсталғаны және Анталия қаласындағы қылмыстық-атқару мекемесіне қамалғаны туралы мәлімет түскен.

"Қазір Қазақстан Республикасының Бас прокуратурасы арқылы Т.Н. Арданды экстрадициялау үшін қажетті барлық құжаттар Түркия Республикасының құзырлы органдарына жолданды. Қазіргі кезде оны қайтару мәселесі түрік тарапында қаралып жатыр", – деп жауап берді Бас прокуратура Tengrinews.kz редакциясының ресми сауалына.

Еске салайық, 2025 жылғың 13 мамырда Қазақстан ҰҚК Анталияда "Астана LRT"-ның бұрынғы басшысы Талғат Арданның ұсталғанын хабарлаған болатын. Сол кезде Қазақстан Бас прокуратурасы Талғат Арданды экстрадициялау туралы сұрауды Түркия Әділет министрлігіне 2019 жылы жолдағаны айтылған.

Осыған байланысты Түркияның құзырлы органдары іздестіру шараларын жүргізген.

"Биыл ҰҚК Талғат Арданның нақты орналасқан жерін анықтап, содан кейін Түркияның құқық қорғау органдары оны Анталия қаласында ұстады. 9 мамыр күні Анталия соты оны Қазақстанға депортациялау туралы шешім қабылдады, қазір ол қамауда отыр", – деп мәлімдеді 2025 жылғы 13 мамырда Қазақстан ҰҚК.

Айта кетейік, Astana LRT-ның бұрынғы басшысы Талғат Ардан осы қылмыстық іс бойынша алты жыл бойы іздеуде болған.

Фото: alrt.kz