Қазақстандық ұшақ Әзербайжанда шұғыл қонуға мәжбүр болды

Air Astana әуекомпаниясының ұшағы Бакудегі Гейдар Алиев атындағы халықаралық әуежайға шұғыл қонуға мәжбүр болды, - деп хабарлайды Malim.kz тілшісі media.az-ға сілтеме жасап.

Мәліметке сәйкес, бұған борттағы жолаушылардың бірінің денсаулығының күрт нашарлауы себеп болған.

Бакуде жолаушыға дереу медициналық көмек көрсетіліп, ол жедел жәрдем бригадасына тапсырылды. Кейіннен толық медициналық тексеру үшін қала ауруханаларының біріне жеткізілді. Осыған байланысты рейстің ұшуы кешіктірілді. Қалған жолаушылар қонақүйге орналастырылды.

"Air Astana әуекомпаниясының 23 наурызда КС 140 рейсі Тбилиси – Алматы бағыты бойынша ұшып бара жатып, жолаушының денсаулығы нашарлауына байланысты Баку әуежайына қонуға мәжбүр болды. Жолаушы жедел жәрдем қызметкерлеріне тапсырылды. Экипаждың жұмыс уақыты аяқталғандықтан, рейстің ұшуы 24 наурызға, жергілікті уақыт бойынша 13:40-қа шегерілді. Жолаушыларға қонақүйге трансфер, тұру және тамақтану қызметтері ұсынылды", – деп хабарлады Air Astana өкілдері.

Фото: pixabay.com